今日搭地鐵個陣，我見到我前面一個女仔同一個男仔Whatsapp緊，本來都唔會突登留意，但實在太多人好逼既關係，加上個女仔部手機個螢幕真係好大，令我不自覺八八掛掛咁睇下佢地對話內容，其實無咩特別，我大概望左十秒左右，就唔忍心再睇落去。
內容大概個男仔唔開心，而我眼前個女仔就表示關心，而且將一句簡單既關心說話再加以修飾，加點曖味說話。個女仔可能覺得仲係唔夠Sweet，於是花左幾秒係Whatsapp揀一個合適又帶點愛意既icon作為句子既終結，然後Send 比對方。男方打字好快，好快就回敬一句"多謝你"，女方亦都好快咁回應 " 我愛你!無論發生咩事都好，我都會係你身邊! " 。
當我睇到依到，心情都比佢地影響左，覺得佢地好Sweet，不自覺咁笑了，個人都開心左。但當個女仔關上同依個男仔既Whatsapp去返原本既Whatsapp list既時侯，我發現張List竟然有個人叫 " 愛爆的老公仔 "，我心諗:『依? 頭先個女仔唔係同緊佢伴侶傾緊計咩? 點解仲有個" 愛爆的老公仔 "係到?。』諗左幾秒，我心裡大概知道發生咩事，心情即使由好變到壞，不禁暗嘆了一口氣。
可能我諗多左，可能個男仔係佢屋企人，可能係佢既親戚，又或者個女仔收緊"兵"，不過都唔重要。
依件事令我係到諗，其實係Whatsapp，Sms種種溝通既工具，打字同對方傾計基本上都唔洗負咩責任，自己都試過同人曖味，傾計既時侯都會花一點心思去修飾對話，令到一句冷冷冰冰既字充滿激情，充滿愛意。不過簡簡單單既『我愛你』三隻字，唔知點解作為男人真係好難講得出口，就算個空間得返一男一女，我地男仔都會突然思覺失調幻想身邊總有人係到，令到我地怕怕羞羞尷尷尬尬唔敢講出口。反而佩服女方可以隨隨便便咁表達心中既愛意。
通常女方會埋怨我地講得少，我地反而覺得講得太多。為左滿足女方既要求，既然把口好難講出口，唯有係Whatsapp打出黎，簡簡單單既三隻字，唔洗消耗體力，唔洗怕比人知，唔洗怕講個陣時走音。女方睇到既時侯，心中一股Sweet Sweet既心情湧哂出黎，之後個一日，女方就會有意無意咁重覆又重覆咁回味個三隻字，於是個人都精神左，開心左。男方收到對方愛意說話既情況亦都一樣，隨時拎住D 字黎一個快樂 J (講笑)。
上述講既都係拍緊拖既情況，男方所講既『我愛你』愈少就愈珍貴。但如果係媾女期間，唔好話我愛你，大量既天馬行空既曖味說話真係你想要幾多，我地就比幾多，媾女呀嘛，打幾隻字哄下你又唔洗少舊肉，你睇得開心，我地打得放心。
但打得多左既時侯，有時侯連自己都唔知自己講既說話係咪真心，係真係表達我心中既愛意定係為左對方開心而打? 有時侯收到對方既曖味說話，其實對方同我一樣，打字哄下我又唔洗少舊肉，我睇得開心，佢又打得放心，但係究竟對方係真心定係同我之前所做既目的一樣呢? 會唔會同一番既曖味說話只係Copy and paste黎哄下我開心，之後又Copy and paste比第二個男仔黎收兵呢?
我諗除左對方知道真相之外，應該無人會知，其實真係好無保障。
唔知大家有冇試過係Msn或者Sms表白呢? 我就試過啦，個陣好多女仔覺得係Msn或者Sms表白係一件好無誠意既事，但個陣既我反而唔覺得有咩問題，咪又係表白! 唔通親口講就係有誠意?
依家我終於明白點解一直以來好多女仔都好想男方親口講出佢地既心意，男方又好，女方又好，至少親口講，都會令人感到一份真心，較有保障既感覺。
所以我決定以後當情到濃既時侯，我都唔會再用文字黎表達，我會即時打比對方表達自己既愛意。
----------------------
----------------
----------
-----
---
-
『喂，阿珍呀!我係田雞啊!係依20年黎，我有句說話一直想同你講!其實.....我愛你。』
Search